Sýningar

Handritin - Saga handrita og hlutverk um aldir

Á sýningu Stofnunar Árna Magnússonar í íslenskum fræðum Handritin gefur að líta nokkrar þjóðargersemar. Sýnd eru ýmis merkustu skinnhandrit frá miðöldum, svo sem Konungsbækur Eddukvæða og Snorra Eddu, Flateyjarbók og valin handrit lagabóka, kristilegra texta og Íslendingasagna, og auk þess mikilvægt pappírshandrit frá seinni öldum.

Hin fornu skinnhandrit geyma einstæðar sögur, kvæði og frásagnir sem varpa ljósi á samfélag, trúarbrögð og hugarheim hinna norrænu þjóða frá ásatrú í gegnum umbreytingatímabil landafunda, landnáms og kristnitöku.

Brugðið er upp myndum frá tímabilinu fyrir ritun handritanna, og af tilurð þeirra, hlutverki, söfnun, útgáfu og viðtökum þeirra hér á landi og í öðrum löndum. Einnig er bókagerðinni sjálfri; skinnverkuninni, bleksuðunni og rituninni, gerð skil í sérstöku rými.

Safnkennari Árnastofnunar tekur á móti skólahópum. Sjá nánari lýsingu á slíkri heimsókn hér>>.

Leiðsögn fyrir hópa af öllum gerðum býðst samkvæmt pöntun. Tungumál: íslenska, enska og skandinavíska. Föst leiðsögn á ensku er í boði á mánudögum og föstudögum kl. 15:00. Sjá nánar hér>>.

Fjölskyldur með börn á aldrinum uþb. 8 - 12 ára geta fengið leiðsagnarhandrit um sýninguna afhent hjá móttökufulltrúa. Í handritinu eru sögurnar af því þegar Sigurður drap Fáfni og Þór veiddi Miðgarðsorm og fleira skemmtilegt út frá myndefni sem á sýningunni er.

Nánari upplýsingar um sýninguna og lista yfir þau handrit sem á henni eru má sjá hér>>.

Vegna handritasýningarinnar deila Árnastofnun og Þjóðmenningarhúsið aðild að Samtökum um sögutengda ferðaþjónustu: 

Ótímabundið frá 5. október 2002

Þúsund ár - fyrsti áfangi

Í þessum fyrsta áfanga sýningarinnar Þúsund ár eru sett fram fjölbreytt verk úr safneign Listasafns Íslands frá 19. öld til nútímans. Sýnd eru valin landslagsmálverk brautryðjendanna, abstraktmálverk og skúlptúrar frá miðri 20. öld og samtímalist í öllum sínum fjölbreytileika. Landslagið og hið þjóðlega er áberandi í íslenskri myndlist þó að alþjóðlegir straumar setji svip sinn á verkin.

Með sýningunni, sem Listasafn Íslands setur upp á rishæð og í stigagangi, er fyrsta skrefið stigið í þá átt að sýningarsalir Þjóðmenningarhússins hýsi allir myndlist á Íslandi í aldanna rás. Þegar sýningin er fullgerð mun hún ná yfir list frá miðöldum til samtímans og þá munu Þjóðminjasafn Íslands og Stofnun Árna Magnússonar í íslenskum fræðum koma að henni með verkum úr sinni vörslu.

Á sýningunni er blað með litlum leiðangri ætluðum börnum að finna verk þar sem ýmislegt úr náttúrunni kemur fyrir.

Ótímabundið frá 22. júní 2011

Ath.: Einkennismynd sýningarinnar, Þingvellir, sem hér er sýnd, hefur verið lánuð tímabundið á sýningu erlendis. Annað verk eftir sama höfund, Þórarin B. Þorláksson, prýðir sýninguna á meðan.

Óskabarn - æskan og Jón Sigurðsson

Sýningin Óskabarn er sett upp í tilefni þess að 17. júní 2011 eru 200 ár liðin frá fæðingu Jóns Sigurðssonar. Skyggnst er inn í uppvaxtar- og mótunarár Jóns í Arnarfirði og Reykjavík og fjallað um dvöl hans og störf fyrir þjóðina í Kaupmannahöfn þar sem hann, og Ingibjörg kona hans, ólu upp systurson Jóns, Sigurð, frá 8 ára aldri. Þetta er litrík sýning um sveitastrák í Arnarfirði, búðarsvein í Reykjavík, stúdent og stjórnmálamann í Kaupmannahöfn; unnustuna þolinmóðu, fóstursoninn Sigga litla, byltingar í Evrópu og baráttumál Íslendinga á 19. öld.

Titillinn Óskabarn endurómar eftirmælin sem Jón hlaut; óskabarn Íslands, sómi þess, sverð og skjöldur, og minnir um leið á upphafningu hans meðal þjóðarinnar sem leiðtoga sjálfstæðisbaráttunnar á 19. öld.
Sýningin er hugsuð út frá sjónarhóli barna og því sérstaklega aðgengileg fyrir fjölskyldur og skólahópa. Brynhildur Þórarinsdóttir, rithöfundur, sem hefur endursagt Íslendingasögur fyrir börn og gefið út aðrar barnabækur, semur texta sýningarinnar. Hönnun er í höndum Sigurjóns Jóhannssonar, myndlistarmanns.

Sýningin er samstarfsverkefni Þjóðmenningarhússins og Afmælisnefndar Jóns Sigurðssonar. Sjá efni um Jón Sigurðsson og viðburði afmælisársins á slóðinni: www.jonsigurdsson.is.

Smellið á myndina til að skoða sýningarskrá Óskabarns.

Frá 15. janúar 2011 um óákveðinn tíma

Bókasalurinn

Í bókasal Þjóðmenningarhússins, gamla lestrarsal Landsbókasafnsins, er Landsbókasafn Íslands- Háskólabókasafn með bókminjasafn. Þar eru til sýnis mörg af úrvalsritum íslenskrar bókmenningar frá upphafi prentlistar á 16. öld til nútímans. Margir fágætir dýrgripir prýða sýninguna, svo sem elstu útgáfur Íslendingasagna, konungasagna og Eddukvæða, Passíusálmar og Vídalínspostilla, lærdómslistarit frá 18. öld, lögbækur og jarðabækur, menningartímarit og þjóðsagnasöfn 19. aldar, skáldverk Halldórs Laxness og fleiri rithöfunda, úrval ljóðabóka og margt fleira.

Þemasýningar um ýmis efni standa að jafnaði yfir í bókasalnum. Salurinn er björt og glæsileg umgjörð fyrir tónleika, fundi, fyrirlestra og aðra viðburði sem haldnir eru í húsinu.

Ótímabundið frá 20. apríl 2000

Samsýning tveggja ljósmyndara

Á yfirstandandi sýningu í myndlistarsýningaröð í verslun og veitingastofu Þjóðmenningarhússins sýna tveir nýútskrifaðir ljósmyndarar verk sín.

Gunnar Örn Árnason sýnir myndir sem birtar verða í 180 síðna bók með ljósmyndum hans af íslenskri náttúru. Í bókinni er leitast við að nálgast náttúru Íslands á listrænan hátt. Myndirnar tók Gunnar Örn úr lofti og af láði á sunnanverðu landinu og miðhálendinu og á þeim má sjá hina stórbrotnu náttúru og hin fjölbreytilegu form og liti hennar. www.gunnarorn.com.

Finnbogi Björnsson sýnir hluta af útskriftarverkefni sínu við Ljósmyndaskólann. Það fallar um sauðfjárrækt í landnámi Ingólfs, það er að segja í Kjós, Þinvallasveit og Selvogi. Sauðfjárrækt er gróin inn í sögu og líf íslenskra þjóðar og sú saga er tengd landinu og nýtingu þess órofa böndum. Þeir bændur sem koma við sögu í verkefninu eiga það sameiginlegt að lífsstíll þeirra er tengdur sauðkindinni og sauðfjárræktinni. Verkefnið er unnið yfir heilt ár þannig að myndirnar eru frá öllum árstíðum. www.finnbogibjorns.com.

Frá 2. mars til 30. maí 2013

Sýningar í fundarstofum

áfram >>

Fundarstofur á 2. og 3. hæð í vesturálmu hússins eru opnar almenningi á sunnudögum.

Ótímabundið frá 20. apríl 2000